गोसाइँकुण्ड मेलाको रौनक

गोसाइँकुण्ड मेलाको रौनक

नेपालको प्रसिद्ध धार्मिक गन्तव्यका रूपमा परिचित रसुवाको गोसाइँकुण्डमा प्रत्येक वर्ष साउन शुक्ल पूणिर्मा -जनैपूणिर्मा) का दिन लाग्ने विशेष मेला सम्पन्न भएको छ । गोसाइँकुण्ड क्षेत्र विकास समितिले यसको विशेष मेलाको -जनैपूणिर्मा) का दिन लाग्ने मेलाको व्यवस्थापन गरेको थियो । ऐतिहासिक पवित्र पर्यटकिय तीर्थस्थलमा सो कुण्डमा स्नान तथा दर्शन गर्न आउने तीर्थालु भक्तजनहरूको संख्या यस वर्ष १० हजार भएको अनुमान छ । गोसाइँकुण्ड क्षेत्र  विकास समितिका अध्यक्ष सञ्जीव डीएमका अनुसार पासाङल्हामु मार्ग रसुवाको राम्चे र मुलखर्क क्षेत्रमा पहिरोले अवरुद्ध भएकाले यस वर्ष यात्रीहरू कम देखिए । समुन्द्री सतहदेखि १४ हजार फिट उचाइमा रहेको गोसाइँकुण्डको लम्बाइ ६ सय मिटर छ भने चौडाइ ३ सय ७० मिटर छ । भगवान् महादेवको बासस्थान हिमालयको काखमा रहेको गोसाइँकुण्ड स्नान गर्नाले जन्मान्तरदेखिको पापबाट  मुक्ति मिल्ने तथा मनले चिताएको भाकल पूरा हुने जनविश्वास रहेकाले बर्सेनि भक्तजनहरूको आगमन ब्ाढ्ने गरेको छ । परम्परादेखि नै मेला लाग्दै आएको ४३८५ मिटर उचाइमा रहेको गोसाइँकुण्डको आसपासमा १ सय ८ वटा कुण्ड छन् भन्ने कुरा विभिन्न धार्मिक ग्रन्थहरूमा उल्लेख छ । गोसाइँकुण्ड कुन् हो भन्ने विषयमा भने विभिन्न ग्रन्थमा भिन्नाभिन्नै  भनाइ पाइएको छ । हाल मेला लाग्दै आएको कुण्डभन्दा १ कि.मि. माथि गोसाइँकुण्ड छ पनि भनिन्छ, जुन कुण्डको सीधा माथितिर चिल्लो एक पहरामा त्रिशूल धारा रहेको पनि हेमार्गी चतुर्मणि चिन्तनमणिमा वर्णन गरिएको छ भनेर  विभिन्न पुराणविद्हरूले बताएका छन् । हाल मेला लाग्दै आएको कुण्डलाई शिवकुण्ड भनिन्छ । यसरी विभिन्न पौराणिक ग्रन्थ वा पुराणविद्हरूका भिन्नभिन्न कथनले भने अहिले केही अन्योल सिर्जना गरिरहेको छ । गोसाइँकुण्ड पुग्ने तीनवटा प्रमुख द्वार छन् । रसुवाको धुन्चे हुँदै पुग्ने द्वार मुख्य मानिन्छ भने नुवाकोटको हेलम्बुबाट लौरीविनायक पास गरेर आउने अर्को द्वार पनि त्यत्तिकै प्रख्यात छ । रसुवाकै यार्सा वा लोकिलक्षेत्रबाट नौकुण्ड हुँदै पुग्न  सकिने अर्को बाटो विकासोन्मुख छ । रसुवातर्फबाट गोसाइँकुण्ड जाँदा सबैभन्दा पुछारमा सरस्वतीकुण्ड पर्छ, जसलाई नागकुण्डको नामले पनि चिनिन्छ । धार्मिक दृष्टिकोणले वर्षमा दुई पटक र पर्यटकीय दृष्टिकोणले वर्षैभरि भीड लाग्ने गोसाइूकुण्डले अन्य जिल्ला तथा मुलुकसँगको सम्बन्ध प्रगाढ बनाएको छ । अन्य क्षेत्रसँगको मितेरी सम्बन्धसँगै गोसाइँकुण्डले यहाँका जनताको गाँसको प्रबन्ध  मिलाउन पनि सहयोग पुर्‍याइरहेको छ । मेलाको बेला भने उचित व्यवस्थापन गर्न नसक्दा तीर्थालुहरूलाई मेला व्यवस्थापक तथा रसुवावासीले पर्याप्त सेवा पुर्‍याउन सकिरहेका छैनन् ।

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.